«

»

марта 11 2014

Распечатать Запись

1453 год. Договорная грамота Суздальских князей

1453 год. Договорная грамота Суздальских князей
10 votes, 5.00 avg. rating (99% score)

 

1453 год. Договорная грамота Суздальских князей, Василия Юрьевича и Федора Юрьевича с князем Дмитрием Юрьевичем Шемякою и с сыном его князем Иваном.
обложка - Новиков. Древняя Российская вивлиофика. 1788 год.

Божьею милостью и пречистые его Богоматери, на сем на всем Господине наш Князь Дмитрей Юрьевич, целуй Крест ко мне ко Князю Василью Юрьевичу и к моему брату молодшему ко Князю Федору Юрьевичу; держати ты нас собе; меня Князя Василья Юрьевича себе сыном, а брата моего молодшего Князя Федора Юрьевича держати его себе братаничем, а сыну ты Господине своему Князю Ивану Дмитриевичу держати меня Князя Василия Юрьевича братом ровным, а меня ты Господине Князя Федора Юрьевича держати сыну своему Князю Ивану братом молодшим; а нам тебя своего Господина держати мне Князю Василью Юрьевичу Господином и отцом, а сына твоего Князя Ивана Дмитриевича держати мы его себе братом ровным; а мне Князю Федору Юрьевичу держати мы тебя себе Господином и дядею, а сына мы твоего Господине Князя Ивана Дмитриевича держати мы его себе братом старейшим.
А добра ты нам Господине и твоему сыну хотети во всем везде, в Орде и на Руси; а нам Господине тебе и твоему сыну Князю Ивану добра хотети во всем везде, в Орде и на Руси. А в прадедину нашу и в дедину, и в отчину в Суздаль, в Новгород, в Городецы и в Вятку, и во всем пятетем Новгородскую тебе сыну нашему Князю Дмирию Юрьевичу и твоему сыну Князю Ивану, не вступатися ни чем: а того ты Господине, и твоему сыну Князю Ивану, под нами не подзирати, блюсти а не обидети, и под нашими детьми, по Крестному целованью. А Орда нам Господине знати собою.
А по моем животе тебе моему Господину Князю Дмитрию Юрьевичу и твоему сыну, под моим братом молодшим под Князем Федором, так же и не подзирати наши отчины, блюсти а не обидети. А что еси был Господин наш Князь Дмитрий Юрьевич отступился своему брату Князю Ивану Ондреевичу наши вотчины, Суздаля, и тебе ныне те наши вотчины Суздаля своему брату Князю Ивану не дати; а которыми ся делы брат твой Князь Иван имеется в нашу вотчину вступати, и тебе нас от него боронити, а за нас ты стояти.
А житии ты Господине и твоему сыну с нами, как жил твой дед Князь Великий Дмитрий Иванович с нашим прадедом с Великим Князем с Дмитрием Константиновичем, по старине и по докончанью. А хто будет Господине тебе Князю Дмитрию Юрьевичу и твоему сыну друг, то и нам друг; а кто будет Господине тебе и твоему сыну недруг, то и нам недруг; а кто будет господине нам друг, то и тебе и твоему сыну друг; а кто будет Господине нам недруг, то и тебе и твоему сыну недруг: и тебе нашему сыну от того нашего недруга нам боронити. А что нам Господине слышев о твоем добре или о лисе, и о твоего сына добре и о лисе, с кого бы ни было, и нам то Господине тебе поведати в правду без хитрости, по Крестному целованью; а тебе Господину нашему и твоему сыну что слышен о нашем добре или о лисе, от кого бы ни было, и тебе то Господине и твоему сыну нам поведати в правду без хитрости, по Крестному целованью.
А случится Господине тебе и твоему сыну канчивати с Великим Князем Василием Васильевичем, или с его братьею молодшею, или с его детьми, и тебе нашему Господину и твоему сыну без нас не канчивати; а нам Господине без тебя и без твоего сына с ними не канчивати.
А что Господине в наше невремя ваши Князи служилые и ваши Бояре покупили в нашей отчине в суздале у нас и у нашей братьи, и у наших Бояр, и у монастырей волости и села, или в Новгороде и на Городце, или что Князь Великий подавал в куплю, а те все волости и села нам по старине и нашим Боярам; а тебе Господину нашему Князю Дмитрию Юрьевичу, и вашим Князям и вашим Боярам, в те волости и села не вступатися. А что Господине брат твой Князь Иван Ондреевич держа за собою отчину нашу Суздаль, ин дал Святой Троице село наше удельное Шухобалово, а другое село наше удельное же продал своему Боярину Петру слободку Шиповскую, а у Княгини у Марьи купил себе Князь Иван село Шекшов(о): ино Господине те села нам по старине; а что будет на Шокшов(е) дал, ин Господине возьмет свою цену по Крестному целованью, что будет на нем дал. А что Господине Князь Великий отъимал у нас без пошлины села, да подавал Святому Рожеству в монастырь в Володимер, и те села нам по старине, как было при нашем прадеде при Великом Князе Дмитрие Константиновиче, а десятое монастырю по старине. А вашему Господине великому Княженью с нашею прадединою, и дединою, и отчиною, суд по старине; а о обидных делах тебе Господине отслати судей опчих, а нам Господине отслати своих судей, ини к тому исправу учинят; а чего наши судьи не узнают, ино им третий ты Господин наш Князь Дмитрий Юрьевич до отца твоего, до Митрополита. А коли Господине всядешь на конь, и нам Господине с тобою всести на конь со всеми людьми; а где Господине пошлешь своего сына, и мне господине с твоим сыном послати своего брата или своего сына со всеми людьми. А боярам и детям боярским и слугам, межи нас вольным воля. А кто имеет житии в вашей отчине в великом Княженьи, а имеет служити нам, и тебе их Господине, и твоему сыну, блюсти как и своих; а кто имеет житии у нас, а имут служити тебе Князю Дмитрию Юрьевичу и твоему сыну, и нам их Господине блюсти как и своих. А приставов ты в нашу отчину не всылати, ни твоему сыну; ни закладней ты в нашей отчине не держати; а также и нам в твоем великом Княженьи закладней не держати. А из чего где Господин наш выступишь, и нам тебе о том помянути, и тебе того обыскать, а тебе нас жаловати; а где мы из сего выступим, и тебе Господину нашему велети нам взвестити, и нам тебе челом бити, а тебе нас жаловати, а за то не сложити. А что будем где грабили, и наши Бояре и наши люди, в твоей отчине в великом Княженьи, ино тому всему дерт по та места, како же даст ты Бог велит достати свое отчины великого Княженья. А суженого не посужати; а суженое, данное, положенное, заемное, кабаленное, поручное, дати по исправе; а холопу, робе, от века суд.
А на сем на всем Господин наш Князь Дмитрий Юрьевич целуй к нам Крест ко Князю Василию Юрьевичу, и ко Князю Федору Юрьевичу, по любви, в правду.

…Года не показано, а по летописям следует быть около 6961 (1453) года. К сей грамоте приложена восковая печать. На обороте написано: Великого Князя Дмитрея Юрьевича с братьею со Князем Васильем, да со Князем Федором, Юрьевичи.

Источник: “Древняя Российская вивлиофика, содержащая в себе собрание древностей Российских, до истории, географии и генеалогии российския касающихся; изданная Николаем Новиковым, членом Вольнаго Российского Собрания при Императорском Московском Университете. Издание второе. Часть первая”. Москва. В Типографии Компании Типографической. 1788  год. Орфография и стиль сохранены, с адаптацией к современному правописанию. Документ подготовил к публикации В.Е. Махалов.

Упоминание: село Шекшово, село Шипово – слободка.

 

Постоянная ссылка на это сообщение: http://gavposad-kraeved.ru/1453-god-dogovornaya-gramota-suzdalskix-knyazej/

Оставить комментарий

Этот сайт использует Akismet для борьбы со спамом. Узнайте как обрабатываются ваши данные комментариев.