«

»

марта 10 2014

Распечатать Запись

1436 год, 13 июня. Две договорные взаимные Грамоты

1436 год, 13 июня. Две договорные взаимные Грамоты
10 votes, 5.00 avg. rating (99% score)

1436 год, 13 июня. Две договорные взаимные Грамоты Князя Дмитрия Юрьевича (Шемяки) с Великим Князем Василием Василиевичем: о бытии им в дружбе и согласии; о управлении всякому своими землями; о возвращении грабежа, взятаго им Князем Дмитрием и братом его Князем Василием; о взаимном вспоможении противу неприятелей; о дани, судах, расправах, и проч.( Прилагается текст первой грамоты).

документ3

первая
Божиею милостью и пречистыя его Богоматере, и по нашей любви. На сем на всем, Господине и брате старейший Князь Великий ВАСИЛЕЙ ВАСИЛЬЕВИЧ, целуй ко мне крест к своему брату молодшему Князю ДМИТРИЮ ЮРЬЕВИЧЮ: быти ти, Господине , со мною с своим братом молодшим везде за один и до своего живота; a мне, Господине, быти с тобою с Великим Князем везде за один и до своего живота. А кто будет, Господине, тобе Великому Князю друг, то и мне друг; а кто будет, Господине, тобе Великому Князю недруг, то и мне недруг. А с кем будешь, Господине Князь Великий, в докончаньи, и тобе и мене  с ним учинити в докончаньи; а яз буду с кем в целованьи, и мне к нему целование сложити. А не канчивати ми, Господине Князь Великий, без тебе, ни ссылатися с твоим недругом ни с кем; ни тобе Великому Князю не канчивати без мене ни с кем. А добра ми тобе Великому Князю хотети во всем везде; а тобе Великому Князю мне добра хоети во всем везде ; а что ми слышев о твоем добре   или о лисе от християнина   или от иноверца, и то ми тобе поведати в правду  без примышленья, по крестному   целованию.  А держати ми, Господине, тебе Великого Князя  в старейшиньстве, как держал твоего Отца Великого Князя ВАСИЛЬЯ  ДМИТРИЕВИЧА мой отец Князь Юрий Дмитриевич; и под тобою ми, Господине, под Великим Князем все твое Великое Княженье держати честно и грозно без обиды, чем тебе благословил твой Отец Князь Великий ВАСИЛЕЙ   ДМИТРИЕВИЧЬ своею отчиною в Москве, и Коломною с волостьми, и Муромом с волостьми и своими примыслы, и всем Великим Княженьем; также что был удел дяди нашего Княжь Петров Дмитриевича, Дмитров со всеми волостьми, опроче Углича поля; или что еси собе примыслил, или что собе примыслишь; или что ты Князь   Великий взялъ собе удел брата   нашего   Княжь Василиев Юрьевича, Звенигород с волостьми и с путми и с селы, и с мыты и со всеми пошлинами, и со всем, что к нему потягло, чем его благословил   мой   отец Князь Юрий Дмитриевичь по отца моего духовной грамоте, оприсно того села, что есмь взял у Семена у Аминева пасынка село в Тростне в своем имени, и то село мое со всем, что к нему потягло, а судом  и данью  тянет къ Звенигороду по старине: а того ми, Господине, всего под тобою под Великим Княземь блюсти, а не обидети, ни вступатися. А тобе, Господине, Великому Князю мене держати, как Отец твой Князь Великий ВАСИЛЕЙ ДМИТРИЕВИЧЬ держал своего брата молодщего, моего отца Князя Юрья Дмитриевича, в братьстве  и во чти без обиды, по докончалным  грамотам; и жаловати  ти   мене , и печаловати ти ся мною и моею отчиною, чем мя благословил  мой отец Князь Юрий ДМИТРИЕВИЧЬ своею отчиною, городы и волостьми и селы; также и тем, чим Господине ты Князь Великий мене пожаловалъ, дал еси нам в вотчину удел дяди нашего Княжь Костянтинов ДМИТРИЕВИЧЯ, Ржеву и Угличе с Московьскими  жеребьи и с волостьми и з селы, и с тем со всем, что было за Князем за Костянтином за ДМИТРИЕВИЧЕМ; также и Костромьских волостей Корегу и Шепкову и Лучиньское и Сурожик, по деловымъ по нашим грамотам, как ся есмы ныне поделили с своимъ братом со Князем с Дмитрием Юрьевичем с меншим: и того ти, Господине Князь Великий, подо мною блюсти, а не обидети , ни вступатися. А Москва нам, Господине, с тобою с Великим Князем держати по душевной  грамоте  деда нашего Великого Князя ДМИТРИЯ ИВАНОВИЧА. А сел ми, Господине, в твоей отчине и во всем Великом Княженьи не купити, ни закладней ми в Москве и во всей твоей отчине в Великом Княженьи не держати; ни тобе, Господине Князь Великий, в моей отчине сел не купити, ни закладней ти в моей отчине не держати. А где всядешь сам на конь на своего недруга, и мне с тобою пойтити; а где мене пошлешь, и мне пойтьти  без ослушания; а где пошлешь своих Воевод, и мне послати с ними своих Воевод. А Орда, Господине, управливати и знати тобе Великому Князю; а у мене ти имати выход по старым девтерем, по крестному целованию, а мне Орды не знати: а переменит Бог Орду, а не даси выхода в Орду и в Ордыньские проторы, и тобе и у мене не взяти. А полон ти, Господине, мой, что будешь у мене взяш, и тобе его сыскав, отдати мне по крестному целованию; а так же, Господине, и ваш полон и всего Великого Княженья, и Князей твоих полон, где будешь в которых городех и в волостех и в селех имал отец мой, или яз, или твой недруг Князь Василей Юpиeвичъ, и мне, Господине, тот весь полон сыскав в своей отчинв, да отдати вам по крестному целованию. А что будут на мои люди, которыи мне служат, пени старые или суды, и кто от судов и от пень и от порук утекле, или межи нас в наше нелюбье людей ваших и наших суды и войны и грабежи; и тому всему дерть по наше первое докончание. А в Вятку ми ся, Господине,  не вступати. А что было отдати отцю моему, что у тебе поимал и у твоее матери у Beликие Княгини честные кресты и святые иконы, или что иное, и по своему докончанью не успел вам отдати, а что будет у мене, и то мне вам отдати по крестному целованию. Или что, Господине, буду взял с своим отцем в другой прииход у тебе у Великого Князя и у твоее матери у Великие Княгини, и у твоих Князей и у Бояр и у детей у Боярьских; или что будет недруг твой Князь Василей Юриевичь поимал твою казну Великого Князя и твоее матери Великие Княгини, и дяди нашего казну Княжю Костянтинову Дмитриевича и Князей твоих служебных и Бояр и детей Боярьских; или где будешь на твоих городех дань имал, или кого грабил твоих   Князей   и Бояр   и детей Боярских, и земских людей во всей твоей  отчине  в Великом Княженьи; или что, Господине, его казны отколе ко мне придет, и отколь чего достану: и мне то, Господине, тобе Великому Князю отдати все по докончанию и по крестному целованию. Также, Господине , что будет и у тебе у Великого Князя, и у твоее матери у Великие Княгини отца моего казны и моее, или чего  еще отколи достанет отца моего казны и моее, и моих Бояр и детей Боярьских; или что будет поимал твой недруг Князь Василей Юриевичь мое  приданое, что будет писано по душевной грамоте моего тестя, и отколе, Господине, чего достанешь, и тобе Князю Великому то мне отдати. Или что, Господине, будешь ныне в твое нелюбие  Великого  Князя у мене взято, и у моих Бояръ и у детей у Боярьских, и  у моих людей, или будет отчину мою кто грабил, и тот грабежь, кто будет что взял, и он отдаст назад все; а кто ся чего заприт, а тому всему суд и исправа: или что будут, Господине, мои люди грабити твою отчину Великого Князя, и твоих Князей и Бояр и детей Боярьских, и земьских людей, ида к твоему недругу ко Князю к Василью к Юрьевичю, или с ним ходя кого будутъ грабили, и им также тот грабеж весь отдати назад; а кто ся чего заприт, а на то суд же и исправа. А что ввел зять твой Князь Александр Ивановичь  отцю моему четыре села, два Гавриловские, да Ярышево, да Ивановьское в долгу в пяти сот рублех, и тобе то, Господине, мне и моему  брату отправити по докончанью; а запрится твой сестричиче, и тобе Великому Князю взяти у него суд по докончанью. А Князей ми, Господине, с вотчинами   не приимати; а Бояром и детем Боярьским и слугам межю нас волным воля. А осада городная, где кто живет, тому туто и сести, опроче Бояр введеных и путников. А где, Господине, будешь итти нашим ратем , и где кто живет в наших отчинах, а кто кому служит, тот с своим осподарем и идет. А где, Господине, ты Князь Великий пошлешь своего Воеводу которого города, а которыи люди того города мне служат, и тем людемъ итьти  под моимъ Воеводою, оприсно Бояр введеных и путниковъ, а моим Воеводам итьти с твоим Воеводою; а кто служит тобе Великому Князю, а живет въ моей отчине, и где пошлем своих Воевод, и тем людем итьти под твоим Воеводою, а моим Воеводам итьти с твоими Воеводами. А кто, Господине, служит тобе Великому Князю, а живет в моей отчине, и мне тех людей блюсти как и своих; а хто, Господине, служит мне, а живет в твоей отчине в Великом Княженьи, и тобе Великому Князю тех людей блюсти как и своих. А даному, положеному, поручному, заемному, кабалному, холопу, робе суд по исправе; а татя, розбойника, рубежника, беглеца по исправе выдати. А суженого не посужати; а суд нам держати межю своих  отчин по старине, в правду, без перевода. А на сем на всем, Господине и брате старейший Князь Великий ВАСИЛЕЙ ВАСИЛЬЕВИЧЬ, целуй ко мне крест к своему брату молодшему Князю Дмитрию Юриевичю, по любви в правду,  без всякия хитрости.  А се нам   докончание правити и до живота. + А писано на Москве, от Рожд.  Хр. 1436 года, Индикта 14, Июня 13 дня).

источник: “Собрание государственныхъ грамотъ и договоровъ, хранящихся в Государственной Коллегии иностранныхъ делъ”, г.Москва, в типографии Н.С. Всеволожскаго, 1813 год.

Орфография и стиль сохранены, с адаптацией к современному правописанию. Документ подготовил к публикации В.Е. Махалов.

документ2

Упоминание: село Гавриловское, село Ярышево.

Постоянная ссылка на это сообщение: http://gavposad-kraeved.ru/1436-god-13-iyunya-dve-dogovornye-vzaimnye-gramoty/

Оставить комментарий

Этот сайт использует Akismet для борьбы со спамом. Узнайте как обрабатываются ваши данные комментариев.